𝐖𝐀𝐒𝐈𝐈𝐑𝐊𝐀 𝐆𝐀𝐑𝐆𝐀𝐀𝐑𝐊𝐀 𝐈𝐘𝐎 𝐌𝐀𝐀𝐑𝐀𝐘𝐍𝐓𝐀 𝐌𝐔𝐒𝐈𝐈𝐁𝐎𝐎𝐘𝐈𝐍𝐊𝐀 𝐃𝐀𝐖𝐋𝐀𝐃𝐃𝐀 𝐖𝐀𝐐𝐎𝐎𝐘𝐈 𝐁𝐀𝐑𝐈 𝐎𝐎 𝐋𝐀 𝐊𝐔𝐋𝐌𝐀𝐘 𝐌𝐀𝐃𝐀𝐗𝐀 𝐔𝐍-𝐎𝐂𝐇𝐀.

Wasiirka Wasaaradda Gargaarka iyo Maareynta Musiibooyinka, Eng: 𝐌𝐨𝐡𝐚𝐦𝐞𝐝 𝐃𝐢𝐫𝐢𝐞 𝐅𝐚𝐫𝐚𝐡 (Shariif), ayaa kulan muhiim ah kula qaatay Caasimadda Mogadishu 𝐂𝐫𝐢𝐬𝐩𝐞𝐧 𝐑𝐮𝐤𝐚𝐬𝐡𝐚 oo ah Madaxa Xafiiska United Nations Office for the Coordination of Humanitarian Affairs (UN-OCHA).

Kulankan ayaa diiradda lagu saaray xoojinta iskaashiga u dhexeeya hay’adda UNOCHA iyo Dawladda Waqooyi Bari, gaar ahaan arrimaha la xiriira gargaarka bini’aadantinimo iyo maaraynta xaaladaha adag.

Labada dhinac ayaa si qoto dheer uga wada hadlay arrimo ay ka mid yihiin isuduwidda gargaarka, abaabulidda dhaqaalaha, xog ururinta iyo u qareemida arrimaha bini’aadantinimada, iyo sidoo kale ka jawaabista xaaladaha deg-degga ah, waxaa kale oo la isla qaatay in la xoojiyo wada shaqaynta si loo gaaro waxqabad hufan oo wax ku’ ool ah, loona hubiyo in gargaar deg-deg ah uu gaaro dadka u baahan.

Hay’adda UNOCHA waxay door muhiim ah ka ciyaartaa la shaqaynta hay’adaha kale ee bini’aadantinimada si loo bixiyo adeegyada aasaasiga ah sida cunto, biyo nadiif ah, daryeel caafimaad iyo waxbarasho.

Kulanka ayaa ku soo dhammaaday is-afgarad buuxa iyo ballanqaad ah in la sii xoojiyo xiriirka wada shaqayneed ee Hay’adda iyo dawladd waqooyibari loona dhiso qorshe istiraatiijiyadeed oo lagu wajahayo xaaladaha degdegga ah ee mustaqbalka.